കൊല്‍ക്കത്ത: സിനിമാ നടിയെയും സഹോദരനെയും നടുറോഡില്‍ കയ്യേറ്റം നടത്തിയ ബംഗാളി ടിവി താരം ജോയ് കുമാര്‍ മുഖര്‍ജിയെ കൊല്‍ക്കത്ത പോലീസ് അറസ്റ്റ് ചെയ്തു. നടി സയന്തിക ബാനര്‍ജിയുടെ പരാതിയുടെ അടിസ്ഥാനത്തില്‍ ശനിയാഴ്ച രാവിലെ ദക്ഷിണ കൊല്‍ക്കത്തയിലെ വസതിയില്‍ നിന്നാണ് ഇയാളെ അറസ്റ്റ് ചെയ്തത്. വെള്ളിയാഴ്ച രാത്രിയാണ് ജോയ്ക്കെതിരെ നടിയുടെ പിതാവ് ടോളിഗഞ്ച് പോലീസ് സ്റ്റേഷനില്‍ പരാതി നല്‍കിയത്. അലിപ്പോര്‍ കോടതിയില്‍ ഹാജരാക്കിയ പ്രതിക്ക് ജാമ്യം അനുവദിച്ചു.
ജോയ്യും സയന്തികയും നേരത്തേ സുഹൃത്തുക്കളായിരുന്നു. ഒന്‍പതു വര്‍ഷത്തോളം ലിവ്ഇന്‍ റിലേഷനില്‍ കഴിഞ്ഞ ഇവര്‍ അടുത്തിടെയാണു പിരിഞ്ഞത്. എന്നാല്‍ ഇതിന്റെ ദേഷ്യത്തില്‍ നടന്‍ കഴിഞ്ഞ ദിവസം ജോയ് സയന്തികയുടെ കാര്‍ തടയുകയും ചീത്ത വിളിക്കുകയുമായിരുന്നു. സയന്തികയുടെ സഹോദരനും ഒപ്പമുണ്ടായിരുന്നു. അദ്ദേഹത്തിനു നേരെയും ജോയിയുടെ ആക്രമണമുണ്ടായി. ആക്രമണത്തില്‍ കാറിനു കേടുപാടുകള്‍ സംഭവിച്ചതായും വിവരമുണ്ട്.
എന്നാല്‍ സയന്തികയ്ക്കു പരുക്കുക്കേറ്റില്ല. സംഭവത്തിനു പിന്നാലെ നടിയുടെ പിതാവു നല്‍കിയ പരാതിയിലാണു പൊലീസ് കേസെടുത്തത്. സൗത്ത് കൊല്‍ക്കത്തയില്‍ ജോയ് സയന്തികയും ചേര്‍ന്ന് ഒരു ഫ്ലാറ്റ് വാങ്ങിയിരുന്നു. 60 ലക്ഷത്തിന്റെ ഫ്ലാറ്റ് വാങ്ങിയപ്പോള്‍ അഞ്ചു ലക്ഷം മാത്രമാണു സയന്തിക നല്‍കിയത്. 25 ലക്ഷം രൂപ ആവശ്യപ്പെട്ടതിന്റെ പേരിലായിരുന്നു വഴക്കെന്നും ജോയിയുടെ സഹോദരന്‍ പറഞ്ഞു.
